'O carro d' 'e disoccupate
Evviva Napule,
tammorre e castagnelle!
Te faje na ballatella,
si staje senza magna'.
L'industria nosta
è sempe 'o buonumore:
ccà sulo 'a panza e 'o core
sapimmo cultiva'.
E truove ne cemmeniero 'ncopp' 'a città
ca jetta nu poco 'e fummo pe' fatica'.
Nun ne truove manco uno sulo:
e si ce sta
coce pasta e fasule.
......................................................
Vuo' 'a sciorta 'e Napule?
E vinnete l'officina;
arapete na cantina,
nne parla tutt' 'a città.
'E mano d'opera?
E' inutile parlarne.
Sulo guafliune 'e carne
ce fanno fraveca'.
E truove chi pover'ommo dint' 'a città
nun tene na sarma 'e figlie che ha da sfama'!
Pe' fatica'
hann' 'a tene' 'a mugliera.
...............................................................
Evviva Napule,
terra cu ccante e suone.
Si fa n'esportazione,
se tratta 'e robb' 'e canta'
Eppure 'o popolo
è chino 'e facce allere:
gente franche e sincere
senza malignità.
E truove pe' tutt' 'o munno n'ata città
ca tene sti mmeraviglie ca stanno ccà.
Senza sorde, tenimmo 'o core.
Che s'ha da fa'?
S'ha da fa' sulo 'ammore.
E chisto è Napule,
ca tene cante e suone:
nun magna pe' fa' 'e ccanzone,
nun dorme pe' s' 'e canta'.
'O carro d' 'e 'mpechere
Sta bella figlia mia, si me sentesse,
'o 'nnammurato sujo nn' 'o calculasse:
facesse comme a mme, se divertesse;
chillo 'o ssapesse e 'ncuorpo cchiù schiattasse.
Guè, cor' 'e mammà,
ammore bello a ffa'
è chillo ca nun cerca carità.
Maritu bello mio, si tu murisse,
p' 'o dispiacere tujo me 'mbriacasse:
pe' lutto 'a vesta rossa me mettesse,
e 'o primmo ca m'ascesse m' 'o spusasse.
Guè, ma chi t' 'a dà
tanta felicità?
Chillu sfurcato a me me sta 'atterra'!
Voglio truva' nu posto 'e cammarera
cu chi nun piglia cunto d' 'e denare,
ca me ne manna d' 'a matina a' sera
e ca mme fa scupa' quanno me pare.
Guè, ma che t' 'e ddà
chisti signure ccà?
Tu manco ô campusanto 'e ppuo' truva'!
Nun pozzo cchiù pava' 'o patrone 'e casa.
<<si vuo' 'o pesone, e tècchete 'a sunata.
Siquistreme 'o mastrillo e 'a rattacasa:
'a stanza 'e lietto già sta siquistrata>>.
Guè, patrone 'e ca',
si mme vuo' fa' sfratta',
'a primma figlia mia m'hê 'a 'mmareta'.
'A retena d' 'e scugnizze
Sta festa, 'o ssa',
nasce e more ccà!
Chi 'a vo' rifa'
nun 'a pò imita'!
E' 'o stesso popolo che 'a fa;
e chistu popolo sta ccà;
e a nisciun'atu pizzo 'e munno
'o puo' truva'!
Guagliu', mo che arrivammo a Piererotta
avimm' 'a fa' ferbune 'e nuvità.
Sa' che ammuina, sa' che votta votta
stasera a Margellina ce sarra'?
Addo' vedimmo sporte 'e ficajuole
sceppammo e ce 'mbrugliammo 'mmiez' 'a ggente:
senza caccia' nu sordo manco 'o sole,
sti ppanze noste s'hann' 'a sazia'.
Dammo vuttate e pizzeche
a tutt' 'e nenne belle;
e po', cu 'e trummettelle,
l'avimm' 'a 'ncuita'.
E mentre 'e scieme sonano
tammorre e caccavelle
nuie tutt' 'e ssacchetelle
l'avimm' 'a pulezza'.
'O carro d' 'e bazzariote
Passarrammo na bella notta
sott' 'a grotta 'e Piererotta
tra 'e guagliune ca vanno a frotte,
cu 'o frastuono e cu 'o votta votta.
Avvistanno na traccagnotta,
agneduno lle dà na botta;
chi s' 'a tira e chi s' 'a votta:
nne facimmo na carnacotta.
'A guagliona ce prova gusto;
cchiù se sfrena e s'allasca 'o busto;
trase tosta pe' 'mmiez' 'a folla
e se n'esce ch'è molla molla.
'A matina, ca sponta 'o sole,
tene 'e ccarne culor viola:
mulignane pe' tutte pizze,
'nfaccia, 'mpietto e 'ncopp' 'e spalle.
Dice 'o pate: E dalle ! E dalle!
'o cucuzziello addeventa tallo.
Pure 'a mamma, arapenno 'e bbraccia,
dice: Scuorno, pe' chesta faccia!
Sola, 'e notte, 'mmiez' 'ammuina,
si' 'a schifezza d' 'e ssignurine.
Che n'hê fatto 'e sta giuventù?
So' zetella cchiù i' ca tu.
Si overo more 'o cuorpo...
(da Canti di guerra e pace)
Si overo more 'o cuorpo sulamente
e ll'anema rinasce 'ncuorpo a n'ato,
i' mo so' n'ommo, e primma che so' stato?
na pecora, nu ciuccio, nu serpente?
E doppo che sarraggio, na semmenta?
n'albero? quacche frutto prelibbato?
Va trova addò starraggio situato:
si a ssulo a ssulo o pure 'mmiez' 'a ggente.
Ma i' nun 'e faccio sti raggiunamente:
i' saccio che songh'io, ca so' campato,
cu tutt' 'o buono e tutt' 'o mmalamente.
E pe' chello che songo sto appaciato:
ca, doppo, pure si nun songo niente,
sarraggio sempe n'ommo ca so' nato.
