Poesie e musica di Peppino De Filippo

Peppino De Filippo, fotografia tratta dal libro "Strette di mano" di P. De Filippo, Marotta Editore

Bongiorno ammore!

Bongiorno ammore,
bongiorno ammore mio,
tutto è cchiù bello e caro
vulenno bene a te.
‘N’ aria ‘e tempesta
pare doce e leggiera,
‘nu tiempo amaro e tristo
pare felicità…
Si ‘e vvote mme faje credere
ca pienze ‘e me lassà
e ‘o core mme faje chiagnere
ca tanto male fa…
m’abbasta vedé splennere
‘st’uocchie ca tiene tu…
ca ‘mparaviso, crideme,
me pare ‘e sta’ cu tte!
. . . . . . . . . . . . . . . . . . . . . . . . . .
Bongiorno ammore,
bongiorno ammore mio…
so’ mille suonne d’oro
stanno vicino a te.
Cantano ‘e sciure
e canta ‘o sole e ‘o mare,
Marì, pe’ chist’ amore
ca vò sultanto a te!
. . . . . . . . . . . . . . . . . . . . . . . . . . .

Lassammoce, Marì

Si, capisco ca l’ammore
passa e ‘o tempo ‘o fa cagnà
e ca resta dint’ ‘o core
‘nu ricordo ‘e falsità…
Ma però si se vò bene
tanto e cu sincerità,
nun ce sta tempo ca ene
ca ‘st’ammore fa scurdà.

Che t’aggia di’,
fa’ chello ca vuo’ tu…
nun voglio cchiù suffrì…
làssame ‘mpace.
Che pozzo fa’?
Lassammoce… accussì…
si nun me saje cchiù di’
parole doce.
Senza cchiù te,
senza cchiù te vedé…
chi sa che ne succede ‘e me.
Ma senza ‘ammore è inutile
nun ce se po’ cchiù ‘ntennere…
Lassammoce, Marì!

Vicino a te

Marì, Marì…
vurria ca ‘o tempo nun passasse maje
quanno tu staje
vicino a me.
Marì, Marì…
se fermasse quanno ‘a vocca toja
vasanno ‘a mia,
amore mio,
‘stu core ‘mpietto
frèmmere me fa!
Vicino a te,
sempe cu tte.
‘Na vita sana:
‘n’eternità!
‘Nfacci’ a ‘stu mare
verde curallo,
sott’ a ‘stu cielo
puntiato ‘e stelle…
io te vurria
tené abbracciata,
anema mia…
vicino a te,
sempe cu tte

Zingara mia

‘Na zingara m’ ha ditto: “… Damme ‘a mano,
te voglio andivinà chi te vò bbene…
si chi te sta vicino o sta luntano
te penza e si te dice ‘a verità…
Ce sta ‘nu core giovane, ‘nu core…
ca senza ‘e te nun sape cchiù campà…”

“Zingara mia… chella nun me vò bbene:
lieggeme meglio e truove ‘a verità!
È ‘na figliola tanto ‘nfama e ‘ngrata
ca pure a te ha ‘ngannato
tale e quale
comme a mme.
Tene ‘na preta 'mpietto e no ‘nu core…
e sulo pene amare
pe’ ‘nu vaso
sape da’.
È ‘na fattura
che m’ha saputo fa’…
ca me fa tanto
chiagnere e penà.
Zingara mia, ha miso ‘int’ a ‘sti vvene…
‘na smania, ‘nu veleno
ca m’accide:
fa murì.
Dille…
dille accussì:
nun farlo, nun farlo cchiù suffrì…
lassalo ‘mpace o dalle dint’ ‘o core
‘nu poco ‘e bbene e de sincerità!”.
. . . . . . . . . . . . . . . . . . . . . . . . . . . . . . . . .

Tu si' chella!

Tu si’ chella ca dicive:
“Nun te pozzo maje scurdà”.
Tu si’ chella ca facive
giuramente in quantità!
Mò conosco, nenna bella,
comme ‘a pienze e chi si’ tu…
saccio buono ca si’ chella
ch’avvelena ‘a gioventù!
Staj cu ‘n’ato ca se crede
tutto chello ca lle dice…
‘o faie credere felice
fino a quanno piace a te!
Pe’ capriccio? Pe’ gulìo?
Pe’ cercà… cercà… chisà?!
E giuranno amore e bene
saje da’ gioie e saje da’ pene.
Nun te saccio di’ manch’io
si è pe’ sfizio o ‘nfamità!

Fino a quanno ‘n ‘atu core
dint’ ‘e bracce nun te tene,
fino a quanno n’ato amore
siente ‘e frèmmere pe ‘tte…
tu si’ chella ca vasanno
pene e gioie sape da’
e faje credere, giuranno,
mille e una falsità.
Me venesse ‘e di’ a chist’ato
ca se crede che ‘o vuo’ bbene
tutto ‘o bbene e tutto ‘o mmale
ca vasanno hê dato a me.
Pe’ capriccio? Pe’ gulìo?
Pe’ cercà… cercà… chisà?!
e giuranno amore e bene
saje da’ gioie e saje da’ pene,
nun ‘o ssaccio di’ manch’io
si pe’ sfizio o ‘nfamità!
. . . . . . . . . . . . . . . . . . . . . . . . . .
Saccio sulo ca si’ chella
ch’avvelena ‘a gioventù!

Chitarrata d'ammore


Nannina tene 'o core 'nfus' 'o ffele,
nun fa 'na cosa si nun me fa male.
Pure pe cchesto 'a voglio bene assaje
ca nun m' 'a putarraggio maje scurdà.

'A cunuscette dinto primmavera
quanno 'o solo è lucente comme a ll'oro
e comme a ll'oro dint'a ll'uocchie tene
'na luce ca te struje e te pò cecà!

Si m'hadda da' 'nu vaso sulamente
me 'o dà cu 'nu mussillo amaro e astrinto
ca me turmenta e nun me sazia maje
j'e desiderio me fa spantecà!

Tene 'e capille nire e anelle anelle...
'na faccia delicata 'e madunnella,
ll'uocchie curvine e 'na vocca 'e curallo
ca 'n'ata eguale nun se pò truvà.

Capisco quanno dice 'na buscìa
e quanno pe' dispietto è 'nfama assaje,
ma è tanta 'a frennesia 'e vulerle bene
ca si m'accide bene me farrà!

Comme te dà 'na gioia te dà 'na pena,
e sape vulé male e vulé bene.
Ma si doce te guarda e t'accarezza
te dà 'o calore d' 'a felicità.

Si sulo m'hadda di' ca me vò bene
primma m' 'o ddice e doppo m'avvelena
cu 'nu dispietto o pure nu' capriccio
ca 'o core me fa chiagnere e penà.

E' 'ntussecosa, sì, ma quanno dice
"Te voglio bene"... allora so' felice.
Allora 'a gioia me trase 'int' a 'stu core
pure si nun ha ditto 'a verità.

E' tanto capricciosa ca 'nu sciore
'e vvote 'a fa felice... e pe' 'nu mare
'e bene e de ricchezze è indifferente
e 'o core te fa strujere e 'mpazzì.

Ma quanno 'a tengo stretta 'int'a 'sti bbracce
e ca me vasa e m'accarezza 'a faccia...
nun ce stanno puntiglie né capricce
che 'a dint' 'o core m' 'a ponno levà!

Vierno trase

P 'o cielo aria 'e tempesta,
sole nascosto...
'nfra terra e mare
nuvole a centenare.

.................................................
Cu 'e prime fridde vene 'a pecundria,
vierno trase...
malinconia!
Si 'na speranza tiene dint' 'o core,
lenta e triste,
se nne more!
Addio sere d'estate
e serenate
cantate p' 'e ciardine
e 'mmiez' 'e vvie.
Addio nuttate belle,
ciele puntiate 'e stelle
si site 'nnammurato
e v'ha lassato,
che pecundria!

Vola 'n'auciello spierzo senz'ammore
comme spierzo
va chistu core.
Scorre p' 'e titte ll'acqua 'mmiez' 'a via,
vierno trase,
che nostalgia!
Addio carezze e vase,
addio sorrise
'mmiez addore d' 'e sciure
j 'e panne spase...
Addio sole d'estate,
addio tiempe passate,
si site 'nnammurato e v'ha lassato,
che pecundria!
......................................................
P' 'o cielo aria 'e tempesta.
Oj bella estate, addio...
mòre ll'ammore mio
e vierno trase!

Penziero fisso

Suonno, nun venì!
Nun voglio durmì.
Voglio sentere ancora
l'onne d' 'o mare
sciulià pe' mmiez' 'e scoglie.
'e Marechiaro
mò forte, mò chiano.
Me voglio ancora gudé
'st' addore 'e gesummine
ca vene da 'e ciardine
luntane e vicine.
Voglio ancora sentì
'o suono 'e 'sti chitarre e manduline
ca scenne 'a Villanova,
Pusilleco, 'a Riviera
e se perde pe' ll'aria profumata
'e 'sti sere d'està!
Suonno, nun venì!
Nun voglio durmì.
Voglio ancora guardà
'sta luna 'argiento
ca splenne luntano
'mmiez' 'e stelle lucente
'e 'stu cielo napulitano!
Me voglio gudé ancora
'a luce d' 'e lampare
addo', sotto, 'o mare
cagna culore
e se fa verde, comme a mattutino.
Voglio ancora sentì
tutte 'e parole d'ammore
ca correno pe' ll'aria
e scenneno 'int' 'o core.
Suonno, nun venì!
Nun voglio durmì...
me metto paura 'e murì!

'A casa vecchia

<<pascalì?… Pascalì?…>>
accussì me chiammava mammà
‘a copp’ ‘o balcone
‘e chillu quinto piano.
‘O balcone era chillo!
Mò ‘o veco ‘a luntano
ma guaglione nc’ haggio campato
assettato pe’ tterra,
cu ‘e gamme appése
for’ ‘a ringhiera
o ‘ncopp’ ‘o casciòne
d’ ‘o per’ ‘e limone
pazziànno accussì… cu quacche ccosa.
So’ passate tant’anne
ma quase me pare ancora
‘e nce sta’ affacciato…
ero giovane allora!
‘A strada è ‘a stessa
ma cchiù affullata
e meno ammuinata.
Tante so’ ‘e ccose
ca nun ce stanno cchiù.
Sultanto ‘a cappelluccia
d’ ‘a Madonna d’ ‘a Neva
cu ‘e vute ‘nnargentate
è rimasta
‘o stesso posto:
nisciuno l’ha tuccata.
Mò ‘o palazzo è suppuntato…
balcune e feneste ‘nzerrate
pecché è disabbitato…!
Fa tristezza a guardà.
<<pascalì?… Pascalì?… >>.
Accussì me chiammava
‘a copp’ a chillu balcone mamma mia.
‘A sentivo ‘a luntano
e si ‘a fine d’ ‘o munno stevo
pure ‘a sentevo.
E spuntanno d’ ‘o vico,
o cu ‘nu canuscente o cu ‘n’amico,
alluccavo:
<<sto venenno, mammàaa… !>>.
<<addo’ si’ stato?
Addo’ vaje curruttianno?
T’aggia sempe aspettà…?>>.
E sempe m’aspettava,
a qualunqu’ora.
Sempe sperùta ‘e mme vedé.
Sempe ‘mpenziéro pe’ mme.
Era chillo ‘o balcone
cu ‘e sciùre a campaniello
e ‘mmiez’ ‘o frisco d’ ‘e ffrònne,
‘int’ a ll’està,
‘a cajòla cu ‘o cardillo:
<<zerepillo>>.
Era chillo ‘o balcone
addo’ papà,
‘int’ ‘o mese ‘aùsto,
muorto ‘e calore,
‘ncazunetto,
nce s’addurmeva fòra
fino a tard’ora…
‘E vvote, sott’ ‘o chiaro d’ ‘a luna,
guardànnolo ‘a luntano,
‘nfra ‘o cchiaro (luce) e ‘o scuro,
nun saccio pecché…
me faceva paura… !
Era chillo ‘o balcone d’ ‘o salotto,
addo’, quanno ce steva ‘n’invitato,
ce se magnava pure.
Me pare d’ ‘o vedé:
‘o divano cu ‘e poltrone
fatte ‘e stoffa trapuntata
e ‘ncopp’a ogni spallèra,
appuntate cu ‘e spille,
‘na capa riccia e nera ‘e tripulino
e sotto, culurata,
‘a bandiera tricolore
cu ‘na scritta ca diceva:
<<tripoli… bel suol d’amore>>.
Chella grossa cristalliera
chien’ ‘e scanzìe:
piatte ‘e porcellana,
tazz’ ‘e cafè… sperlunghe, ‘nzalatiere…
chella bella zuppiéra
‘e ‘nu servizio scumpagnato
ca piaceva tanto a papà…!
‘E butteglie ‘e resòlio
tantu bello allineate
comme a ccose prelibbate
che s’avevano tuccà
sulo pe’ cerimmonie
importante:
pe’ ‘nu nomme ‘nfamiglia
o pe’ ffeste ‘e matrimmonie.
<<pascalì?… Pascalì?… >>.
Chella cunsòlla ‘e mogano
cu ‘a frutta ‘e cera ‘ncoppa
e ‘o rilorgio ‘attone
sott’ ‘a campana ‘e vrito…
attuorno ‘nce passava
‘nu trenillo culurato
che a sennùzze cammenava
e ‘mpunto mieziuorno
- Giesù! – fiscava.
‘Mmiez’ ‘a stanza
‘o tondo cu ‘o tappeto ‘e velluto
russo cu ‘e sciùre gialle
e ‘mmiez’ ‘o lume a cisto
cu ‘a campana celeste
e ‘a frangia ‘e curalle.
‘E vierno, vicino, ‘nce s’arrutuliava
<<taitù>>,
‘na mucella
bastardella
cu ‘o manto pezziàto
‘e tanta culure.
Tutte ‘e tteneva…
lle’ ce mancava solamente ‘o bblù.
‘Na mucella ‘e casa
ca se passava ‘a vita
tra ‘o salotto e ‘a cucina.
Si ‘nu sòrece vedeva
era ‘a primma a scappà…
già tutt’ ‘e sùrece d’ ‘a casa
ll’acchiappava papà!
Comme faceva? Mah… !
Chella cucina…!
Larga, spaziosa,
ca deva ‘int’ ‘o ciardino
d’ ‘o palazzo ‘e rimpetto,
e ‘na funesta ariosa… !
Menta e vasennicòla
rinfrescate ogne matina
d’ ‘a funtanella ‘e ll’acqua d’ ‘o Serino
ca lle steva vicino.
Appise, sott’ ‘e trave,
sòvere e mellune capuanièlle
e mazze ‘e pummarulelle
ca servevano p’ ‘o viérno.
Me pare ‘e sentì ancora
‘addore ‘e strùffele a Natale…
chine ‘e zucchero squagliato
e ‘ncoppa, sparpagliate,
cunfettielle ‘argiente e diavulille.
‘Nfaccia ‘o muro
tièlle e cassaròle,
tant’erano lustre, lucevano
quanno, ‘e striscio, nce passava
‘ncoppa ‘nu raggio ‘e sole
‘a stess’ora,
ogne matina d’està
e de juorno
quanno traseva vièrno.
Casa vecchia, casa antica…
casa amica
addo’, primma guagliòne
e doppo giuvinotto,
haggio sunnato…
sperato…!
Chella càmmera ‘e lietto
fresca, pulita,
cu ‘e llenzòle ‘e tela fina
e cu ‘a coperta ‘e picchè
quanno traseva estate
e ‘mbuttita
a ‘e prime fridde!
Chillu paràto ‘e carta
a stelle e a strisce verdoline…
nc’avevo scritto ‘ncoppa,
vicino ‘a fenesta,
sotto ‘e tendine,
‘o nomme mio e ll’età.
Va’ trova si ancora ce sta.
‘A vigliosa appicciata,
‘e notte, si ‘a fissavo,
me faceva ‘ntravvedé
tutte ‘e ccose culurate
a poco a poco
ca ‘o suonno me pigliava.
Veco ‘e trasì a mammà,
‘a primma matina,
cu ‘e capille tirate ‘ncopp’ ‘o cuollo
e ‘o càmmeso ‘e percalle
e ‘mmano ‘a tazza d’ ‘o ccafè…:
<<susete, Pascalì… Faje tarde ‘a scola…>>.
<<uffa… mammà…
Voglio durmì cinche minute ancora…>>.
<<e duorme. Si pateto se scéta
‘o ssaje, bello ‘e mammà, po’ che succede…>>.
Comme a ‘na funa fràceta
m’accumminciavo a sòsere…
‘e pressa me vestevo.
E nun appena vestito,
(passanno ‘o curreturo)
‘mpont’ ‘e piede
pe’ nun me fa’ sentì ‘a papà,
puntualmente,
dint’ ‘o scuro,
jevo a tuzzà cu ‘a capa ‘nfaccia ‘o muro
o ‘nfaccia ‘o stàntero d’ ‘a porta
o ‘nfaccia ‘a cappelliera,
e nun mancava maje,
comme si fosse pe’ fatalità,
‘a coda scarpesata ‘e Taitù.
Cu ‘e libbre e cu ‘a marenna sott’ ‘o braccio,
‘nguacchiato ‘e suonno,
m’avviavo pe’ ‘sta via
p’ ‘a strata ca purtava ‘a scòla mia.
Cchiù grussiciello
ascevo ‘a ‘stu purtone
no cchiù tenenno libbre e panariéllo
comme pe’ ghi ‘a scola…
ma pe’ truvà fatica
mò ccà… mò llà!
Mammà, rimasta sola,
cchiù ‘e primma
aspettava
ca turnavo!
Cchiù ‘e primma s’apprettava
si me vedeva ‘e tardà!
Casa vecchia, casa antica:
casa amica!
Mò chella voce nun m’ ‘a puorte cchiù.
È fernuta!
Pe’ sempe se n’è ghiuta…!
È rimasto ‘o balcone
Ca sta llà.
No comme a ‘na vòta,
ma ce sta;
ma pe’ quant’atu tiempo ce starrà?
Forse pe’ tanto ancora
o ancora pe’ poco…!
Po’ tutto cagnarrà
comme a tant’ata cose ‘e chesta strada
so’ cagnate.
Ma chella voce…!
Ah! Chella voce me pare d’ ‘a sentì:
<<pascalì?… Pascalì?…>>.

Penziero pe' 'nu core ca se vò bene


So' tante ll'anne
ca ce vulimmo bene
ca tutte 'e ccose d' 'o munno
m'arricordano 'e te:
'na matenata 'e sole,
'na jurnata afòsa,
'na stesa 'e campagna,
'o silenzio 'e 'na montagna,
'nu ciardino,
'na schiuppata 'e rose,
'nu cielo corallino,
'na vranca 'e cèrase...
'na vela p' 'o mare,
'na sera d'autunno...
'na frònna,
'na lettera 'ngialluta,
'na camicetta 'e seta,
'o sisco 'e 'nu vapore,
'o suono 'e 'na campana...
'na voce luntana...
'n' auciello in amore,
'o calore 'e 'na notte d'està,
'nu rispiro,
'nu fiato,
'na sera 'e vierno...
'nu ligno appicciato...!
È 'nu ricordo eterno
'st'ammore nuosto
ca dint' 'o core mio
eternamente sta.
Stann' 'int' a ll'uocchie tuoje,
chiare e sincere,
tutt' 'e penziere mieje.
È bello, anema mia,
a campà comme campammo:
io pe' tte
tu pe' mme!

'Nu penziero... accussi'

Ha campato felice
pecché ha fatto comme se dice?
'a vita 'e 'nu santo.
Penitenze e preghiere
matine e sere.
Niente fumo, niente ammore.
Ha vuluto campà
sulo facennte "bene"
pure quanno, in verità,
nun sentiva d' 'o ffa'.
'Na vita 'e sacrifizie
senza se fa passà ched' è 'nu sfizio?
Tutto chesto pecché?
Pe' guderse all'al di là
'o Paraviso eterno.
Ll'avite visto muorto?
Sì, è overo, pareva ca dicesse,
pe' bbia 'e chillu sorriso
ca teneva:
"Me stongo, finalmente,
godenno 'o Paraviso...!".
A mme m'è parso, invece,
ca chillu pizzo a rriso
vulesse di': "... Campate,
campate comme a mme.
Privateve 'e tutto
Mettennove, accussì, contro "natura".
Qua' Paraviso, Inferno o Purgatorio?
Storie!
Nun esiste niente:
niente è overo!
'A vita e 'a morte songhe 'nu mistero
ca né vivo né muorto
nisciuno po' svelà!
Campate, campate comme a mme
contro "natura" ...
e po' vedite che bella fregatura !"