Eduardo poeta

« Older Newer »

filu'

Posted on 21/5/2005, 09:15

Io vulesse truvà pace

Io vulesse truvà pace;
ma na pace senza morte.
Una, mmiez'a tanta porte,
s'arapesse pè campà!

S'arapesse na matina,
na matina 'e primmavera,
e arrivasse fin''a sera
senza dì: << nzerràte llà!>>

Senza sentere cchiù 'a ggente
ca te dice: << io faccio..., io dico>>,
senza sentere l'amico
ca te vene a cunziglià.

Senza senter''a famiglia
ca te dice: << Ma ch''e fatto?>>
Senza scennere cchiù a patto
c''a cuscienza e 'a dignità.

Senza leggere 'o giurnale...
'a nutizia impressionante,
ch'è nu guaio pè tutte quante
e nun tiene che ce fà.

Senza sentere 'o duttore
ca te spiega a malatia...
'a ricett''in farmacia...
l'onorario ch''e 'a pavà.

Senza sentere stu core
ca te parla 'e Cuncettina,
Rita, Brigida, Nannina...
Chesta sì... Chell'ata no.

Pecchè, insomma, si vuò pace
e nun sentere cchiù niente,
'e 'a sperà ca sulamente
ven''a morte a te piglià?

Io vulesse truvà pace
ma na pace senza morte.
Una, mmiez'a tanta porte
s'arapesse pè campà!

S'arapesse na matina,
na matina 'e primmavera...
E arrivasse fin''a sera
senza dì: << nzerràte llà!>>]

Edited by filu' - 16/10/2006, 00:40

filu'

Posted on 21/8/2006, 10:08

Stammatina

Me sò scetato tant''e buonumore,
ca, p''arapì 'o balcone,
me sò nfilato sulo nu scarpone.
Chill'ato...
no pè dispietto, o pè me cuffià,
s'è annascunnuto...
nun l'aggio truvato...
forse pecché vuleva pazzià.

Me sò scetato tant''e buonumore:
e me cuccaje cu chella ncacchiatura...
Pè qua' ragione? E chi ne sape niente...
Aissera me credevo,
ve giuro, ca 'o ssapevo...
Essa dicette ca... che ssaccio che...
Io rispunnette ca... che ssaccio quanto...
Ca nun è nato ancora
chi adda fa fesso a me,
ca sò nu santo...

Ma mò port''o ccafè.
L'aggio sentuta
c''o steva abbrustulenno.

S'è vestuta,
e m''o pporta redenno.
E nu surzo pedôno nce 'o ppigliammo
for''o balcone.
E zitto, nun parlammo...
sentènnece cchiù buone
e cchiù felice.
Essa capisce chello ca nun dico,
mentr'io capisco chello ca nun dice.

Ll'aria fresca e pulita d''a matina
ce lav''a faccia.
'E penziere c''e sceglie.
'A cuscienza ce 'annetta.
E quant'è bello,
si 'o saje vedè "napulitanamente",
Napule!
E' bello 'e juorno, 'e notte, e a mmatutino.
E quant'è bello 'o nomme p''o chiammà!

'Ojllanno, San Martino,
ca se vò fà vedè senza na nuvola...
E i' pure, 'o bbì, tengo nu pede scàuzo...
Sent''o ffrisco d''a preta.

1941 da "Le poesie di Eduardo" Gli struzzi 76

:cavaliereconrose4wc4sk.gif:

filu'

Posted on 3/9/2006, 10:01

Il 1973 fu l'anno del colera, a Napoli.
A settembre Eduardo scrisse la poesia "L'imputata" e a novembre, alla prima della commedia "Il sindaco del Rione Sanità" uscì sul proscenio e la recitò. C'ero anch'io e sento ancora la sua voce...

"Cara còzzeca, tu staie nguaiata",
dicette 'o magistrato. "'O fatto è chisto,
ccà nun te salva manco Giesù Cristo:
o l'ergastolo, o muore fucilata.

Qua ci sono le prove, figlia mia...
Tu hai portato il bacillo del colera:
la tua presenza è una presenza nera,
'a ggente more all'erta mmiez''a via.

Che dici a tua discolpa?" "Ecco, vedete...
Affunn''o mare 'a còzzeca s'arrangia",
dicette l'imputata, "e lo sapete...

Là sotto, Presidè, pare l'inferno!
Chello c'arriva, 'a cozzeca se mangia:
si arriva mmerda, arriva dall'esterno".

da: Le poesie di Eduardo Gli struzzi 76

filu'

Posted on 15/10/2006, 23:43

Embè, una cosa è leggerla, un'altra è sentirla dalla voce del grande Eduardo!

Edited by filu' - 5/6/2010, 13:34

filu'

Posted on 30/7/2007, 22:35

Penziere mieje...

Penziere mieje, levàteve sti panne,
stracciàtev''a cammisa, e ascite annuro.
Si nun tenite n'abito sicuro,
tanta vestite che n'avit''a fa?

Menàteve spugliate mmiez''a via,
e si facite folla, cammenate.
Si sentite strillà, nun ve fermate:
nu penziero spugliato 'a folla fa.

Currite ncopp''a cimma 'e na muntagna,
e quanno 'e piede se sò cunzumate:
un'ànema e curaggio, e ve menate...
nzerranno ll'uocchie, primm''e ve menà!

Ca ve trovano annuro? Nun fa niente.
Ce sta sempe nu tizio canusciuto,
ca nun 'o ddice... ca rimmane muto...
e ca ve veste, primm''e v'atterrà.

1948
Le poesie di Eduardo Einaudi

filu'

Posted on 1/8/2007, 07:50

'A fenesta

E tengo na fenesta a pianterreno,
c'affaccia int'a na strada scanusciuta;
cu n'aria prufumata, e na veduta,
ca si t'affacce, nun t''a scuorde cchiù.

Si stongo 'e buonumore, affacci' a mmare,
e veco semp''o stesso bastimento
ca parte chin''e fede e sentimento,
e c''a bandiera d''a sincerità.

Parte sicuro, e nun arriva maje.
Quanno s'abbìa, s'abbìa c''o maistrale;
ma ncòccia sempe 'o stesso tempurale,
'o stesso maletiempo, e adda turnà!

Quanno senza speranza, e senz'ammore
m'affaccio e vec''o stesso bastimento,
nce mengo dinto 'o core mio scuntento,
e c''o mare ntempesta dico "Va".

Quann'è bontiempo, ognuno è marenaro
e se vulesse mettere a temmone...
C''o mare ncalma, tutte songo buone
'e purtà nu vapore a passià.

Miéttece a buord''o bene ch''e vuluto,
e tutt''o chianto amaro ch'è custato...
Nisciuno bastimento s'è affunnato
quanno ce''e miso a buordo 'a Verità.

1947

filu'

Posted on 4/8/2007, 11:09

'A gatta d''o palazzo

Trase p''a porta,
pè nu fenestiello,
pè na fenesta, si t''a scuorde aperta,
quanno meno t''aspiette.

Pè copp''e titte,
da na loggia a n'ata,
se ruciulèa pè dint''a cemmenera.
E manco te n'adduone
quann'è trasuta:
pè copp''o curnicione
plòffete!, int''o balcone,
e fa culazione
dint''a cucina toja.

E' 'a gatta d''o palazzo.
Padrone nun ne tene.
Nunn'è c''a vonno male,
ma essa 'o ssape
che manc''a vonno bene.

Te guarda cu dduje uocchie speretate:
lèsa.
N'ha avute scarpe appriesso e ssecutate.
E' mariola!
Ma 'a povera bestiella, c'adda fa?
E' mariola pecché vò mangià.

E' mariola...
Chest''o ddice a' ggente;
ma i' nun ce credo, pecché, tiene mente:
tu lasse int''a cucina,
che ssaccio...
nu saciccio.

Làsselo arravugliato
dint''a na bella carta 'e mille lire.
Tuorne 'a matina:
'a mille lire 'a truove, che te crire?
Nzevata. Ma sta llà.

1946

filu'

Posted on 12/8/2007, 09:11

'E pparole

Quant'è bello 'o culore d''e pparole,
e che festa addiventa nu foglietto,
nu piezzo 'e carta -
nu' mporta si è stracciato
e pò azzeccato -
e si è tutto ngialluto
p''a vecchiaia,
che fa?
che te ne mporta?
Addeventa na festa
si 'e pparole
ca porta scritte
sò state scigliute
a ssicond''o culore d''e pparole.
Tu liegge
e vide 'o blù
vide 'o cceleste
vide 'o rrussagno
'o vverde
'o ppavunazzo,
te vene sotto all'uocchie ll'amaranto
si chillo c'ha scigliuto
canusceva
'a faccia,
'a voce
e ll'uocchie 'e nu tramonto.
Chillo ca sceglie,
si nun sceglie buono,
se mmescano 'e culure d''e pparole.
E che succede?
Na mmescafrancesca
'e migliar''e parole,
tutte eguale
e d''o stesso culore:
grigio scuro.
Nun siente 'o mare,
e 'o mare parla,
dice.
Nun parla 'o cielo,
e 'o cielo è pparlatore.
'A funtana nun mena.
'O viento more.
Si sbatte nu balcone,
nun 'o siente.
'O friddo se cunfonne c''o calore
e 'a gente parla cumme fosse muta.
E chisto è 'o punto:
manco nu pittore
pò scegliere 'o culore d''e pparole.

1971

filu'

Posted on 21/11/2007, 17:32

Quanno 'a capa parte

Quanno 'a capa è partuta
certamente
'a capa è ccapa...
Ch'è fatta, treno,
ca tene l'orario
ca, per esempio,
a pagina trentotto,
te dice: il treno tale
parte a tal'ora,
arriva totte e totto*?

'A capa può sapè quann'è partuta
ma p''o fatto 'e sapè
l'ora e ll'arrivo,
pè do' è passato
e quanto nce ha mettuto
pè te mannà,
mettimmo,
all'atu munno...
e che ne pò sapè,
ch'è fatta, treno?

1960
*totte e totto: misura indefinita o di tempo o di quantità o di qualità.

filu'

Posted on 24/3/2008, 11:12

'O pparlà nfaccia

Io chesto tengo:
tengo 'o pparlà nfaccia.
Pure si m'aggia fà nemico 'e Ddio
e me trovo cu "isso"
faccia a ffaccia,
nfaccia lle dico chello c'aggia dì.
Se scummoglia 'o fenucchio?*
E se scummoglia!
Ccà, pè tenè cupierte st'altarine,
se sò mbrugliate 'e llengue*
e nun se sàpe
chi te fa bene
e chi
male te fa.
Si nun se mett''o dito ncopp''a piaga
e se pulezza scafutann''a rinto*
fino a che scorre 'o sango
russo e vivo
cumm'a chello 'e Giesù
nostro Signore
'a piaga puzza!
E siente nu fetore
ca t'abbelena* ll'aria
'a terra
'o mare.
E nuie vulimmo ll'aria fresca e pura
celeste e mbarzamata*
e chillu viento
ca vulanno
e passànno
a rras''e mare*
se piglia 'addore*
e 'a mena int''e balcune
pè dint''e stanze
e arriva ncopp''e lloggie*
d''e case noste.

1971

se scummoglia 'o fenucchio: si sfoglia il finocchio, cioè si mette a nudo ciò che era nascosto;
llengue: lingue;
pulezza scafutann''a rinto: pulisce raschiando a fondo;
abbelena: avvelena;
mbarzamata: balsamica;
a rras''e mare: a pelo d'acqua, sul mare;
addore: odore (in nap. è sost. femm.);
lloggie: terrazze.

filu'

Posted on 28/11/2009, 23:29

'A sagliuta

Mmiez' a sta folla 'e ggente scanusciuta,
tu saglie, saglie... e nun arrive maje.
C''o ffrisco me menaje pè sta sagliuta,
cu na schiuppat''e sciure accumminciaje;

cu nu culletto 'e purcellana bianca,
e cu na striscia 'e satinè annuccata;
ncopp'a na macchia blù ca nun te stanca,
pecché è nu blù celest' 'e matenata.

E ciente sciur' 'a dint' a sti cullette;
tutte capille curte e dispettuse;
tutt'uocchie e tutte recchie a bentagliette;
tutte caparbie... e tutte curiuse:

<<palicco>>, <<voccapierto>>, <<frangettella>>,
<<'O merluzzo slavato>>, <<maccarone>>,
<<ziracchio>>, <<cap' 'e mbomma>>, <<sputazzella>>,
<<cicciomitocca>>, <<zeza>>, <<pachialone>>...

Cunfiette a cannelline, russulille,
trezzell' 'e ddivinizia e barchetelle,
mmiez' a bettun' 'e scarpe e diavulille,
mmiscate cu 'e ppuntine a fraschetelle.

Saglienno ce tenèvemo p' 'a mano
pè paura 'e ce perdere p''a via,
sapenno ca chi saglie e va luntano,
le pare niente, stanno ncumpagnia.

A poc''a vota chillo... pò chill'ato...
pò n'ato... chilli tre... chill'ati dduje...
e rrieste cu nu passo rassignato:
chest'è 'a sagliuta ca facimmo nuje.

<<ziracchio>> se vestette 'a Bersagliere...
e chi l'ha visto cchiù?... <<cicciomitocca>>
me pare d''o vedè... me pare ajere...
c''a nocca nganna, e c''o cunfietto mmocca.

E rieste sulo, senza cchiù n'amico,
mmiez'a nu munno nuovo, chin''e ggente:
ognuno ca te guarda è nu nemico...
Chi more doppo, more overamente.

1948

fogli_e

Posted on 29/11/2009, 01:30

Senior Member

Group:: Member

Posts:: 10,195

Te gusta?:: +11

Status:

Sottotitoli, please ... :filu:

filu'

Posted on 30/11/2009, 11:08

Agli ordini, kapo!

'a sagliuta: la salita
schiuppat''e sciure: fiori sbocciati
annuccata: legata a fiocco
'e matenata: del cielo del mattino
recchie a bentagliette: orecchie a sventola
Palicco: stuzzicadenti, magrissimo
Voccapierto: bocca aperta, che non sa tenere segreti
Frangettella: che porta la frangetta
Ziracchio: misura equivalente a meno di un palmo, dunque basso
Cap''e mbomma: testa di bomba, con la testa grossa e tonda
Sputazzella: che fa la saliva agli angoli della bocca quando parla
Cicciomitocca: smorfioso
Zeza: timido come una donnetta
Pachialone: grosso e grasso
cunfiette a cannelline, russulille: confetti con la cannella, rossastri
trezzelle 'e ddivinizia e barchetelle: liquirizia a trecce e a barchette
bettune: bottoni
diavulille: confetti piccolissimi, multicolori
ppuntine a fraschetelle: pennini con un disegno di frasche, foglie
nganna: alla gola
(Palicco, Voccapierto, Frangettella, 'O merluzzo slavato, Maccarone, Ziracchio, Cap''e mbomma, Sputazzella, Cicciomitocca, Zeza e Pachialone, sono soprannomi di bimbi, che andavano a scuola con l'Autore).